ګرين ليف فاونډېشن د ټولشموله خدمتونو يوه خيريه اداره
ګرين ليف فاونډېش يوه ناسياسي، او د انساني مرستو ټولشموله خيريه اداره ده چې د واشنګټن ايالت له بهرنيو چارو وزارت سره رسماً ثبت ده. دا اداره ژمنه ده او وياړي چې په متحده ایالاتو کې د کډوالو او پناه غوښتونکيو لپاره په بېلابېلو برخو کې د لاندې پروګرامونو له لارې هر اړخيزه خدمتونه وړاندې کوي. ګرين ليف فاونډېشن په هر حالت کې د کډوالو او پناه غوښتونکيو ملاتړ او مرسته کوي. موږ ویاړو او خوښ یوو چې په واشنګټڼ ایالت کې رسماً د خپلو فعاليتونو د پیل خبر ورکوو.
زموږ لیدلوری
ګرين ليف فاونډېشن د داسې يوې ټولنې په تکل کې ده چې په کې هر وګړی په ټوله مانا خپله توانايي درک کړي؛ د يو بامفهمومه ژوند څښتن شي، او د ټولنې له نورو غړيو سره مرستندوی اوسي. ګرين ليف فاونډېشن د يو داسې چاپېريال د رامنځته کولو په هڅه کې دی چې په کې ټول ماشومان، ښځې او سړي ارزښتناک، د قدر وړ او د ټولو هغو منابعو درلودونکي وي چې ژوند یې پرې سوکاله کېدای شي.
زموږ ماموریت
ګرين ليف فاونډېشن اړمنو خلکو ته هر اړخیزه مرسته او منابع برابروي. ګرین لیف فاونډېشن غواړي چې د مرستې، ځواکمنتيا او عدالتغوښتنې له لارې په ټولنه کې د يو بل منلو، پر ځان د اتکا او د ټولنیزې خیر ښېګڼې هڅې پیاوړې کړي. ګرين لیف فاونډېشن غواړي چې د ټولنې اوسېدونکي داسې پياوړي شي چې مخې ته پراته خنډونه ټول مات کړي، منابعو ته لاسرسی ولري او په خپل شخصي او مسلکي ژوند کې بریالي وي.
ګرين ليف فاونډېشن د یوې داسې ټولنې د جوړولو لپاره هلې ځلې کوي چې هر غړی یې د درناوي، ملاتړ او نازونې وړ وي.
زموږ موخې
-
د ټولنې غړيو ته د پوهنیزو فرصتونو، مسلکي روزنیزو پروګرامونو، او د مهارتونو د ودې د پروګرامونو برابرول؛
-
د ټولنې غړيو ته د ظرفيتونو لوړولو فرصتونه او پروګرامونه برابرول؛
-
د ټولنې غړيو ته د دنده موندنې په برخه کې روزنیز پروګرامونه برابرول او به دنده موندنه کې یې لاسنیوی او ورسره همکاري کول؛
-
د ټولنې د پیاوړتيا او د غړيو له یو بل سره د تړلتيا په موخه ټولنیز نوښتونه کول، د فرهنګي راکړې ورکړې پروګرامونه جوړول، او د عدالتغوښتنې هڅې کول؛ او
-
یقيني کول چې د ټولنې اوسېدونکي ټولو اړينو منابعو ته لکه پوهنیزې، روغتيايي، قانوني مرستو او ټولنیزو خدمتونو ته لاسرسی لري.
